Monday, August 10, 2009

ஜெர்மனியில் உயர்கல்வி(1) - கேள்வி பதில்

சாதரணமா உயர் கல்வி அப்படினா உடனே எல்லாருக்கும் நினைவு வர்றது அமெரிக்கா, கனடா, லண்டன் மற்றும் ஆஸ்திரேலியா போன்ற நாடுகள் தான். இந்த நாடுகள் எல்லாத்துலையும் ஒரு ஒற்றுமை என்ன?, ஆங்கில வழி கல்வி.

ஐரோப்பா உயர்கல்விக்கு ஒரு நல்ல இடம். ஆன மக்கள் பல காரணங்களுக்காக பயப்படறாங்க மேலும் சரியான செய்திகள் வருவதில்லை. நான் ஜெர்மனியில் ஐந்து வருடமாக இருந்தாலும் ஸ்வீடன் நாட்டில் கல்வி இலவசம் (கல்லூரிக்கான கட்டணம் எதுவும் கிடையாது) என்பது எனக்கு போன வாரம் தான் தெரியும்.

அதனால முடிந்தால் ஒரு பதிவோ இரண்டு பதிவோ (பதிவை பொறுத்து) ஜெர்மனியில் உயர்கல்வி சாத்தியக்கூறுகள் குறித்தும், எவ்வாறு தொடங்குவது விண்ணப்பிப்பது போன்ற விடயங்கள் இங்கு பகிரலாம்னு இருக்கேன்.

நம்ம மக்கள் விண்ணப்பம் எல்லாம் எப்படி போடறது அப்படிங்கறதை தெரிஞ்சுக்கறதுக்கு முன்னாடி நிறைய கேள்விகள் கேட்டு உறுதிபடுத்திகிட்டு தான் அப்ளை பண்ணலாமா வேணாமா சொல்லி யோசிப்பாங்க. அது மாதிரி சாதரணமா தோன்ற கேள்விகள், என்னை இதுவரை கேட்கப்பட்ட கேள்விகள் எல்லாம் தொகுத்து தர்றேன். உங்களுக்கு வேற எதாவது கேள்வி தோணிச்சுன்னா சொல்லுங்க, எனக்கு தெரிஞ்ச வரைக்கும் பதில் சொல்றேன். இதுக்கு அப்பறம் விண்ணப்பிக்கரது எப்படின்னு விலாவாரியா ஒரு பதிவு போடறேன்.

ஏன் ஜெர்மனி ??

இங்கு நிறைய நல்ல உலக தரம் கொண்ட பல்கலை கழகங்கள் உள்ளன. அங்கு ஆங்கில வழியிலும் நிறைய பாடங்கள் குறிப்பாக முதுகலை பட்டப்படிப்பு படிக்க வாய்ப்புகள் உள்ளன.

ஒரு ஆண்டுக்கு முன் வரை கல்வி எல்லா பல்கலைகழகத்திலும் இலவசமாக இருந்தது. ஆனால் இப்போது கல்லூரிக்கு தகுந்தாற்போல் ஒரு செமஸ்டருக்கு 500 - 750 ஈரோ வரை கல்விக்கட்டணம் உள்ளது.

எவ்வளவு பணம் தேவைப்படும் ??

அதாவது, உங்களுக்கு ஒரு பல்கலை கழகத்தில் அனுமதி கிடைத்தவுடன் விசா வாங்கும் பொழுது 7800 ஈரோ உங்கள் பெயரில் டி. டி.யாக காட்டப்பட வேண்டும். இதை நீங்கள் ஜெர்மனி வந்த பிறகு இங்கு உங்கள் வங்கிக்கணக்கில் இந்த பணத்தை சேர்பித்து, ,விசா நீட்டிக்கும் பொழுது அதை காண்பிக்க வேண்டும்.

இதை தவிர உடை, விமான கட்டணம் அனைத்தும் தனி.

எதுக்கு இந்த 7800 ??

இது உங்களுக்கு ஆகும் ஒரு வருட செலவு அதாவது உங்களோட தங்கும் இடம், உணவு, புக்ஸ், போன்ற செலவுகள் என்பது ஜெர்மன் கல்வித்துறையின் கணக்கு. அதாவது ஒரு மாதத்திற்கு 650 ஈரோ விகிதம் பன்னிரண்டு மாதத்திற்கு

12*650 = 7800 என்பது அவர்கள் கணக்கு.

இங்கு ஆகும் செலவு எவ்வளவு?

தங்கும் இடம் - 150 - 300 ஈரோ வரை (ஒருவருக்கு, நீங்கள் தேர்வு செய்யும் வசதிகளை பொறுத்து, மேலும் நீங்கள் இருக்கும் ஊரை பொருத்தும் வேறுபடும் )

மருத்துவ காப்பீடு - 60 ஈரோ (மருத்துவ காப்பீடு அனைவருக்கும் அவசியம்).

உணவு - 100 ஈரோ (இது மிக அதிக பட்சம் நீங்கள் தினமும் நீங்களே சமைத்து உண்ணும் பட்சத்தில்)

மொபைல் - 30 ஈரோ (நீங்கள் இருபத்தி நான்கு மணி நேரம் இந்தியாவிற்கு பேசுபவர்கள் என்றால் இது செல்லுபடியாகாது.

மாதம் 400 - 600 ஈரோ வரை செலவு ஆகும். இதில் தண்ணி தம் இணைக்கப் படவில்லை. மேலும் நீங்கள் கல்லூரிக்கு செலுத்தவேண்டிய கல்விக்கட்டணம் தனி. முக்கால் வாசி கல்லூரிகளில் நீங்கள் பயணிக்க தேவையான பப்ளிக் டிரான்ஸ்போர்ட் டிக்கட்டுகளும் இதிலேயே அடங்கும்.

விசா எவ்வளவு காலம் தருவார்கள் ?

நீங்கள் இந்தியாவில் முதல் முறையாக விசா பெறுகையில் மூன்று மாதம் கொண்ட 'டூரிஸ்ட் விசா' மட்டுமே கொடுக்க படும். பிறகு ஜெர்மனி வந்தடைந்த பின் கல்லூரியில் இணைந்து பிறகு விசாவை நீட்டித்து கொள்ளலாம். அது உங்கள் ஊர், உங்கள் கல்லூரி, உங்கள் கல்விக்கு தகுந்தார் போல் ஒரு வருடம் அல்லது இரண்டு வருடம் கொடுக்கப்படும்.

பாட மொழி ஆங்கிலமா ??

ஆங்கிலத்தில் அமைந்த முதுகலை பட்டப்படிப்பு நிறைய பல்கலை கழகங்கள் வழங்குகின்றன. நீங்கள் விண்ணப்பம் அனுப்புகையில் அதை உறுதி செய்து கொண்டு அனுப்புவது நல்லது. சில பல்கலைகழகங்கள் 50 சதவிகிதம் ஆங்கிலத்திலும், 50 சதவிகிதம் ஜெர்மன் மொழியிலும் பாடங்கள் வழங்குகின்றன.

மொழியை அறிதல் எவ்வளவு முக்கியம் ??

நீங்கள் இணையும் கல்லூரியில் பாடக்கல்வி ஆங்கிலத்தில் இருந்தாலும், தினசரி வாழ்க்கை அதாவது நமக்கு தேவையான பொருட்கள் வாங்கிக்கொள்ள, நண்பர்களுடன் பேச, பார்ட்டி சென்றால் மக்களுடன் உரையாட ஜெர்மன் அறிதல் நல்லது.

ஜெர்மன் தெரிதல் விண்ணப்பிக்கும் பொழுது தேவையா ??

நீங்கள் தேர்வு செய்த பாடம் ஆங்கில வழி கல்வி எனில் அவசியம் இல்லை. 50 சதவிகிதம் ஆங்கிலம்/ஜெர்மன் எனில் தேவை. நீங்கள் சேரும் பல்கலைகழகத்திலும் சொல்லித்தர வாய்ப்பு உள்ளது.

ஏதேனும் கன்சல்டன்சி இருக்கா ??

இது நோகாம நொங்கு எடுக்கறவங்க கேக்கறது. அம்பதாயிரமோ, ஒரு லட்சமோ கொடுத்துபுட்டு, அவுங்க விண்ணப்பம் அனுப்ப மட்டும் ஒரு பெரிய தொகை வாங்கி நிறைய பேர் ஏமாறுகிறார்கள். குறிப்பாக ஹைதராபாதில் இருந்து இது போல நிறைய நடக்கிறது.

நான் அறிந்த வரையில் எந்த ஒரு பல்கலைகழகமும் ஒரு கன்சல்டன்சியுடன் ஒப்பந்தம் செய்வது இல்லை. இந்தியாவில் உள்ள சில பல்கலைகழகத்திற்கும் குறிப்பாக (IIT) மற்றும் சில நிறுவங்களுக்கும் வேண்டும் என்றால் ஒப்பந்தம் இருக்கலாம். ஆதலால் அனாவசியமாக பணத்தை கொடுத்து ஏமாறாதீர்கள். இது போல் கன்சல்டன்சியிடம் செல்வதால் இன்னொரு தவறும் நடக்கிறது. அவர்கள் 50% ஜெர்மன் மற்றும் 50% ஆங்கிலம் போன்று அமையும் பாடங்களை சரியாக சொல்லாமல் ஆங்கிலத்தை மட்டுமே நம்பி வந்து மாணவர்கள் ஏமாறுகிறார்கள்.

தயவுசெய்து, உங்கள் விண்ணப்பம் நீங்களே தயார் செய்யுங்கள், பல்கலை கழகத்திற்கோ இல்லை அவர்கள் விண்ணப்பத்தில் கூறியுள்ள முகவரிக்கு குறிப்பிட்ட நேரத்தில் விண்ணப்பம் அனுப்பப்பட்டால், உங்களுக்கு ஆம்/இல்லை என்ற பதில் நேரடியாக சொல்லப்படும். இதில் ஒளிவு மறைவே கிடையாது.

படிச்சு முடிச்ச உடனே வேலை கிடைக்குமா ??

அது உங்கள் கையில். நிறைய சாத்தியங்கள் இருக்கு. நல்ல பெரிய பெரிய கம்பெனிகள் இருக்கு. ஆனால் இங்க வேலை செய்யறதுக்கு ஜெர்மன் மொழி ரொம்ப முக்கியம். அது இல்லாம ஒண்ணும் பண்ண முடியாது.

பகுதி நேர வேலை வாய்ப்பு குறித்து ?

மாணவர்கள் படிக்கும் நேரம் போக மற்ற நேரங்களில் வேலை செய்து பணம் சம்பாதிக்க வழி உள்ளது. இதற்க்கு சட்டமும் வழி ஏற்படுத்தி தந்துள்ளது. அதாவது மாதத்திற்கு என்பது மணி நேரம் நீங்கள் மாணவர்களாக வேலை செய்யலாம்.

பகுதி நேர வேலை இரண்டு விதமாக உள்ளது. ஒன்று, நீங்கள் படிக்கும் படிப்பு சம்பந்தமாகவே நீங்கள் படிக்கும் கல்லூரியிலோ, எதாவது பேராசியரிடமோ செய்யலாம்.
இரண்டு, கடின உடல் உழைப்பு உணவு விடுதிகளில், சில கம்பனிகளில் என்பது போன்று.

மேலும் இது நீங்கள் வசிக்கும் நகரம், படிக்கும் படிப்பு, உங்கள் ஜெர்மன் திறமை இது போன்று பல விடயங்களை பொறுத்து உள்ளது.

இது வரையில் உங்களுக்கு கேள்வி இருக்கும் பட்சத்தில் கீழே தெரிவியுங்கள். அடுத்த பகுதியில் ஜெர்மனியில் மாஸ்டர்ஸ் படிக்க எவ்வாறு விண்ணப்பிக்க வேண்டும், யாரை அணுகலாம், பலகலை தகவல்கள் பற்றிய மேலதிக விவரங்களுடன் சந்திக்கிறேன்.

அன்புடன்,
எஸ்.கே.

13 comments:

எம்.எம்.அப்துல்லா August 10, 2009 at 9:28 AM  

//இது வரையில் உங்களுக்கு கேள்வி இருக்கும் பட்சத்தில் கீழே தெரிவியுங்கள் //

இத்தனை வயசுக்கு அப்புறம் எங்கப்பா என்னைய படிக்க அனுப்புவாரா???

:)))

அமுதா கிருஷ்ணா August 10, 2009 at 9:29 AM  

மிக நல்ல பதிவு..எந்தெந்த நகரங்கள் படிக்க ஏற்றவைகள்
(சீதோஷணம்,கட்டணம் குறைவு--போன்றவை) என்ற விபரமும்,இஞ்சினியரிங் அல்லாத மற்ற துறைகள் பற்றியும் விபரம் அளித்தால் நலம்.நன்றி..

Anonymous August 10, 2009 at 9:37 AM  

really very useful posting. all the best.

SK August 10, 2009 at 10:03 AM  

அண்ணே, வாங்க. நல்லா இருக்கீங்களா. ஆனா அப்பா ஆனா நீங்க படிக்க அனுப்புவீங்களே??

அமுதா கிருஷ்ணா, அடுத்த திங்கள் அன்று வெளி ஆகும் அடுத்த பகுதியில் நீங்கள் கேட்டதை பற்றி மேலதிக தகவல்கள் தருகிறேன். நன்றி.

மயில், ரொம்ப நன்றி.

வினையூக்கி August 10, 2009 at 10:17 AM  

அருமை நண்பா!!!

பதி August 10, 2009 at 10:18 AM  

உபயோகமான பதிவு....

ஜோசப் பால்ராஜ் August 10, 2009 at 6:09 PM  

மிக அருமையா தொகுத்து வழங்கியிருக்கீங்க குமார்.

இதை படிக்கும் கல்லூரி பேராசிரியர்கள் இவற்றை மாணவர்களுக்கு கொண்டு சேர்க்க வேண்டுவோம்.

SK August 10, 2009 at 10:34 PM  

நன்றி வினையூக்கி செல்வா, செல்வா

நன்றி ஜோசப்.

Viji August 10, 2009 at 11:44 PM  

useful info

SK August 16, 2009 at 10:24 PM  

Thank you Viji

Sowmya Gopal August 18, 2009 at 1:20 PM  

We seem to share a telepathic connection !! I cannot believe that we almost have the same information presented in the same way in our blogs....only mine is in English - check this out - http://sowmyagopal.blogspot.com/2009/08/studying-in-germany-before.html and whats more I just wrote it a week before you did !!! I am seriously surprised...chancea illa !

SK August 18, 2009 at 1:35 PM  

SG, Its really surprising.. :-)

I have also wrote next post this week. Please check and if you find something wrong or need to change. Please do tell me. It will be of great help. I thought of re-writing things what I have written in tamil here in English for general help. Now I have your posts.

Vinod October 3, 2011 at 3:04 PM  

excellent! Kumar. Very Informative.

  © Blogger template 'Fly Away' by Ourblogtemplates.com 2008

Back to TOP